بوجھو تے مناں 1

قدلو چڑن تریہاۓ سڑن

لکا نال روٹیاں پوکھے مرن

روزے

ہری اے، لعل بھری اے

لالہ جی دے باغا بچ

دوشالا اوڑھ کھلی اے

مکئی

پارو آۓ دو ملنگ

چٹی ٹوپی ہک رنگ

دیہں تے چن

شکلی کتاب (فیس بک)

اء نویں تے سوکھی کتاب اے
اس دے اندر علم بے حساب اے
شکلاں ہن سونڑیاں سونڑیاں
اء سویٹ سیلفی دا کمال اے
ننڈے ہن کہٹ تے کنڑیاں ہن زیادہ
کنڑیاں دی تصویر دا بڑا ہے فائدہ
دوست بنڑدے جلدے نیں آپنڑیں آپ
ایزی لوڈ ملدے نیں بے حساب
خطاں اتے خط پۓ آندے ہن
ہائ hi دی رٹ پے لاندے ہن
کردے ہن دوستی دیاں عرضیاں
تے پچھدے ہن محبت دیاں مرضیاں
اء تے شوق بڑا عام اے
اس تو ہٹ کے بھی بڑا کام اے
کوی بیچدے دوایاں تے کوی کریم ہن
خریدنڑاں والیاں دے آپنڑیں نصیب ہن
مفتیاں دے ہن فتوے تے مولویاں دیاں نصیعتاں
بڑے بڑے مندر تے بڑیاں بڑیاں مسیتاں
پسند کرن تے مسلمان نہ کرن تے کافر
شیئر کرو تے جنتی نہ کرو تے مصیبتاں
اء کتاب ہی نہی عمرو عیار دی زنمبیل اے
جو چاہو دیخ کہنو جو کج ہے زمین تے
اے لوکاں نال ملاندی اے
تے نویاں خبراں بھی سنڑاندی اے
اس دے صفعے ہن بے حساب
رنگ برنگیاں بولیاں تے رنگ برنگے نواب
سونڑیں بڑناں دے طریقے تے نویں نویں کباب
معلوماتاں دے ٹہیر تے حکیماں دے جلاب
سنگتاں نال سنگتاں ملاندے ہن
اسطرع نواں گروپ بنڑاندے ہن
آپڑیں آپڑین شوق مکاندے ہن
رل مل کے گپ شپ لاندے ہن
میں بھی بڑایا اے آپڑاں صفحہ
ناں اسدا رخیا اے ‘ہندکو مزہ’
تے جس جس مکو ملناں اے
سرچ کرو ‘نظر بزمی’ مڑا ناں اے

نظربزمی